أول مفاجأة ...... الكود المصري لتصميم المنشئات وتنفيذها لحد عندك

السلام عليكم ورحمة الله وبركاته

ازيكوا يا شباب وايه أخبار الدراسه يارب يكون كله تمام وكله زي الفل

يتشرف فريق الدعم الدراسي إنه يقدم أحد خدماته للدفعه العزيزة
الكود المصري لتصميم المنشئات وتنفيذها لحد عندك

بعد محاوله مع ادارة الكليه الحمد لله توصلنا لاتفاق مع الاداره اننا ان شا الله هنقدر (ان شا الله) نجيب الكود المصري لكل طالب محتاجه في دفعتنا

طب ايه هيا الأكواد اللي احنا محتاجينها أصلا؟؟

قعدنا مع معيد في قسم خرسانه واتكلمنا في الموضوع ده وقالنا ان الاكواد اللي احنا محتاجينها لحد التخرج هي:

1. الكود المصري لتصميم وتنفيذ المنشئات الخرسانية :وده طبعا معروف للجميع اللي فيه الجداول واسس التصميم والثوابت والحدود بتاعت التصميم اللي بنستخدمه في الماتيريال والخرسانه وده مهم لينا السنه ده والجايه ان شا الله وسنه رابعه للي هيدخل انشاءات.
سعر الكتاب بعد الخصم للطلبه: 26.50 جنيه
2. مساعدات التصميم مع أمثلة طبقا للكود المصري لتصميم وتنفيذ المنشئات الخرسانية: وده كلنا شوفناه اللي هو الكتاب اللي بناخده في امتحان الخرسانه
الكتاب ده يحتوي على كيرفات ومعادلات تصميم المنشئات الخرسانيه مع أمثله للتصميم وده هحتاجه السنه ده طبعا والجايه ان شا الله واللي هيدخل انشاءات في سنه رابعه ان شا الله.
سعر الكتاب بعد الخصم: 30 جنيه.
3. دليل الإختبارات المعملية لمواد الخرسانة: ده بقى كتاب ضخم كده فيه كل الاختبارات المتعلقه بكل مواد الخرسانه وبالخرسانه زي اختبارات الاسمنت والركام بتاعت الترم الاول وزي اختبارات الخرسانه بتاعت الترم ده مشروحه شرح مفصل بالصور. الكتاب ده مهم السنه ده (بس خلاص السنه قربت تخلص) ومش مهم خالص السنه الجايه بس مهم في سنه رابعه ان شا الله للي هياخد مشروع ماتيريال ان شا الله.
سعر الكتاب بعد الخصم: 27.5 جنيه.
4. الكود المصري لاسس تصميم وشروط تنفيذ المنشئات المعدنية والكباري على اساس اجهادات التشغيل: ده بقى محدش فينا سمع عنه قبل كده.
الكتاب ده زي بالضبط كود الخرسانه بس ده لماده الاستيل اللي هناخدها السنه الجايه. فيه كل ثوابت التصميم واسس التصميم والكيرفات المستخدمه في تصميم المنشئات المعدنيه.
سعر الكتاب بعد الخصم: 15 جنيه

(الاسعار ده جايبينها من المركز القومي لبحوث الاسكان والبناء)

طيب هو ايه الخصم ده؟؟
الخصم ده خاص بالطلبه كان زمان ممكن تروح بالكارنيه تجيبه بس دلوقتي مبقاش فيه خصم إلا لما تجيب تصريح رسمي من الكليه بإسم الكتب اللي انت محتاجها فاحنا وفرنا عليك كل ده وهنعمل احنا الاجراءات ونروح نجيب الكتب لحد عندك ان شا الله.

طب وهو قبل الخصم يعني هيفرق اوي؟؟
اه هيفرق كتييييييييييييييييييييييييييييييييييييير انا واحد من الناس قلت مش هتفرق وروحت جبت كتاب دليل الاختبارات (هو مكانش ليا كان لحد متخرج) ومن غير خصم كان ب 130 جنيه.

طيب ونتأكد ازاي من الاسعار ده؟؟ او لو انا هعرف اروح اجيبه لوحدي اتصل بيهم ازاي؟؟
انت مش واثق فينا ولا ايه ياعم انت :D:D
ممكن يا سيدي تتصل بالمركز القومي لبحوث الاسكان والبناء على الارقام التاليه: 33356722 - 33356853
او عنوان المركز: تركب المترو لحد محطه الدقي هتنزل تلاقي المركز قدامك.

طب أعمل ايه عشان أتوصل ليكوا؟؟
كل اللي عليك تعملوا إنك تملا الفورم ده وإن شاء الله هنتصل بيك لما نبدأ نلم الفلوس بعد ما نخلص التصاريح كلها ونجيب الكتب.
https://docs.google.com/spreadsheet/viewform?formkey=dFVXd19ldUlrZHJWbFZ6N0ZCSlBBOEE6MQ#gid=0

اخر معاد للتقديم هو أول يوم في امتحانات الميدترمات ان شا الله

طولت عليكوا شويه معلش
جزاكم الله خيرا
وربنا يوفقنا جميعا